ബഹു ധനകാര്യ മന്ത്രി ഡോ ടി എം തോമസ്‌ ഐസക്കിന്റെ facebook പോസ്റ്റില്‍ നിന്നും ..................സ്കൂളുകള്‍ക്കെല്ലാം പുതിയ കെട്ടിടങ്ങള്‍ ആവുകയാണ്. ബഞ്ചും ഡസ്കുമെല്ലാം പഴഞ്ചന്‍ തന്നെ. ഈയൊരു പൊരുത്തക്കേട് പലയിടത്തും കാണാം . ഇതിനു പരിഹാരമായി കേരള ആര്‍ട്ടിസാന്‍സ് ഡെവലപ്പ്മെന്റ് കോര്‍പ്പറേഷന്‍ ഗുരുകുലം പദ്ധതിക്ക് രൂപം നല്‍കിയിരിക്കുകയാണ് . മൂന്ന് ലക്ഷം രൂപയ്ക്ക് അന്‍പത് കുട്ടികള്‍ക്ക് ഇരിക്കാവുന്ന പത്ത് ഡസ്ക്കുകളും ബഞ്ചുകളും അധ്യാപക മേശയും ഗ്രീന്‍ ബോര്‍ഡും , ആധുനീക പ്രകാശസംവിധാനങ്ങളും ഫാനും പുസ്തക അലമാരയും ഒരു പാക്കേജ് ആയി അവര്‍ ലഭ്യമാക്കുകയാണ്. ട്രീറ്റഡ് റബ്ബര്‍ വുഡ് കൊണ്ട് ആണ് ഉണ്ടാക്കിയിരിക്കുന്നത് . കാണാന്‍ ചന്തം തന്നെ, ഇത് പോലെ തന്നെ ലൈബ്രറിയും ലാബും, അധ്യാപക മുറിയും എല്ലാം അവര്‍ ഡിസൈന്‍ ചെയ്തിട്ടുണ്ട്. കലവൂര്‍ സ്കൂളില്‍ ഒരു ക്ലാസ് മുറി മാതൃകയായി തയ്യാറാക്കിയത് ഞായറാഴ്ച സ്കൂളിനു കൈമാറി . ഇതുപോലെ എല്ലാ ക്ലാസ് മുറികളും രൂപാന്തരപ്പെടുത്താം എന്നാണ് അവരുടെ വാഗ്ദാനം . അപ്പോള്‍ നിലവിലുള്ള ബഞ്ചും ഡസ്കും മേശയുമെല്ലാം എന്ത് ചെയ്യും എന്നായിരുന്നു എന്‍റെ ചോദ്യം . ഇപ്പോള്‍ തന്നെ പഴയ പല ബഞ്ചും ഡസ്കും അറ്റകുറ്റപ്പണികള്‍ നടക്കാതെ ഉപയോഗശൂന്യമായി കുന്നുകൂടി കിടക്കുകയാണ് . പഴയ പല മരസാമഗ്രികളും ഒന്നാംതരം ഉരുപ്പടികള്‍ തന്നെയാണ് . അത് കൊണ്ട് എന്റെ നിര്‍ദ്ദേശം മറ്റൊന്നായിരുന്നു . ഓരോ സ്കൂളിലെയും മര ഉരുപ്പടികള്‍ പരിശോധിച്ച് അവ പരമാവധി ഉപയോഗപ്പെടുത്തി കൊണ്ട് വേണം നവീന മാതൃകയില്‍ ഉള്ള ബഞ്ചും ഡസ്കും തയ്യാറാക്കാന്‍ . തികയാതെ വരുന്നത് ഒരു പുതിയ രീതിയില്‍ ഉള്ള ഫര്‍ണിച്ചര്‍ ആവാം . ഏതായാലും ആദ്യം മാരാരിക്കുളത്തെ സ്കൂളുകളില്‍ ഇത്തരത്തില്‍ ഒരു എസ്റ്റിമേറ്റ് തയ്യാറാക്കാന്‍ പറഞ്ഞിരിക്കുകയാണ് . എനിക്ക് തോന്നുന്നു പുതിയ ഫര്‍ണിച്ചര്‍ വാങ്ങുന്നതിന്‍റെ മൂന്നിലൊന്നു ചിലവേ വരികയുള്ളൂ . ആര്‍ട്ടിസാന്‍സ് ഡെവലപ്പ്മെന്റ് കോര്‍പ്പറേഷന്‍ എല്ലാ ജില്ലകളിലും പത്തുപേരുടെ പന്ത്രണ്ടു ഗ്രൂപ്പുകള്‍ രൂപീകരിച്ച് ( ആശാരിപ്പണിക്കാര്‍ , കൊല്ലപ്പണിക്കാര്‍ എന്നിങ്ങനെ ഇതുമായി ബന്ധപ്പെടുന്ന എല്ലാത്തരം പണിക്കാരും) പണി ആരംഭിക്കുകയാണ്. അവര്‍ യാന്ത്രികമായി ഒരേ മോഡലില്‍ ഉള്ള ഫര്‍ണിച്ചര്‍ ഉണ്ടാക്കുന്നതിന് പകരം ഓരോ സ്കൂളിനും സാഹചര്യങ്ങള്‍ക്കനുസരിച്ച് പ്രത്യേകമായി രൂപകല്‍പ്പന ചെയ്യേണ്ടി വരും. ഇതൊരു വെല്ലുവിളി ആയി ആര്‍ട്ടിസാന്‍സ് ഡെവലപ്പ്മെന്റ് കോര്‍പ്പറേഷന്‍ ഏറ്റെടുത്തിരിക്കുകയാണ് .